Kalaallit Nunaata ilinniartitaaneq pingaarnertut sulissutiginiarpaa !
- Nunat avannarliit akornanni Kalaallit Nunaat innuttami ilinniagaqarnissaat siunertaralugu aningaasartuuteqarnerpaavoq
Kalaallit Nunaanni pisortat aningaasartuutaasa 19 procentingajaat ilinniartitaanermut atorneqartarput. Aningaasaliissutinit aningaasartuutaanerpaasoq (26 pct.) tassa isumaginninnermi aningaasanik atuineq, ilinniartitaanerli aningaasartuutaanerpaasut tulleraat. Finlandimi, nalunngisattitut nunat assigiinngitsut akornanni naammassisanik uuttuinernut tunngatillugu tamatigut qutsissumiittartoq uissuumminalaartumik appasissumik, tassalu 12 procentit missaannaannik ilinniartitaanermut atugassanik aalajangiussisimavoq – Nunani Avannarlerni inissiineq atsinnerpaaq. Avannaani nunat taamaattoq pisortatigut missingersuutimikkut salliutittuaannarpaat aningaasat peqqinnissamut, isumaginninnermut taamatullu ilinniartitaanermut atugassat annerpaamik aningaasaliiffigineqassasut.
Tamanna soorlu aamma Nordisk Statistisk Årbogimi 2011 pingasunngornermi 16. novemberimi saqqummersumi, erseqqissagaasoq. Tassani atuarneqarsinnaavortaaq:
· 2010-mi meeqqat 4.000-nit ikinnerunngitsut ingiallorneqaratik Avannaanut takkuttut. Taakkunani amerlanerit 15-nit 17-illu atornanni utoqqaassuseqarput amerlanerillu Sverigemut pisarlutik. Taamaattoq 2009-miit malunnarpoq annikilleriartut, tamatumanimi meeqqat ingiallorneqaratik Avannaanut takkuttut 6.000-ingajaapput. Meeraq ingiallorneqanngitsoq tassaavoq inuk 18-t inorlugit utoqqaassusilik, nunamut isertoq angajoqqaaminit imaluunniit meeqqamut akisussaasumik ingiallorneqarani. Meeqqattaaq, nunami iserfimminni nakkutigineqanngitsut, tunngaviatigut ingiallorneqanngitsutut isigineqarput.
· Malik aamma Ivaana atiupput 2010-mi Kalaallit Nunaanni nuannarineqarnerpaasut. Nunani Avannarlerni atinik nuannarineqarnerpaasut makkuupput, (Danmarkimi) William aamma Isabella, (Savalimmiuni) Jónas aamma Anna, (Finlandimi) Elias aamma Emma, (Ålandimi) Leo aamma Ella, (Islandimi) Jón aamma Sara, (Norgeimi) Lucas aamma Emma, (Sverigeimi) Oscar aamma Maja.
Atuagaq, Nunani Avannerlerni Ministerit Siunnersuisoqatigiivinit saqqummersinneqartoq, DKK 240-nik akeqarpoq nunanilu avannarlerni tallimaasuni, tassalu Danmarkimi, Finlandimi, Islandimi, Norgemi, Sverigemi Savalimmiuni, Kalaallit Nunaanni taamattullu Ålandmi kisitsisaasunik assersuunneqarsinnaasunik imaqarluni. Taamatuttaaq kisitsisitigut tuusintilinnik qarasaasiakkut nunani avannarlerni inooqatigiinnermut tunngasunik paasissutissanik akeqannguanngitsumik qimerluuisoqarsinnaalluni. Database aamma Nordisk Statistisk Årbog 2011 pdf-tut immikkut nassuiaasersugaq iserfigineqarsinnaavoq una atorlugu www.norden.org.
Nunat avannarliit kisitsisinngorlugit 2011 quppersagaq mikinerusoq Nunani Avannarlerni Ministerit Siunnersuisoqatigiivisa nittartagaanni akeqanngitsumik pissarsiarineqarsinnaavoq tuluttut, svenskisut finskisullu allassimasoq.
______________________________________________________________________________
Paasissutissanik annertunerusumik perusukkuit Bolatta Vahl, tlf. +299 36 23 74, bova@stat.gl saaffigisinnaavat.